БИШКЕК, 10-янв. — Sputnik. Баткендеги Кадамжай районунун Халмион айылында жайгашкан "Баяман баатыр" базарында иштеген соодагердин ишенимине кирип, 120 миң долларын алдап алып кеткен киши Өзбекстандан кармалып, Кыргызстанга экстрадицияланды. Бул тууралуу облустук милиция билдирди.
Маалыматка ылайык, окуя 2015-жылы болгон. Ош шаарынын 43 жаштагы тургуну Исраил Ганиев Кадамжайдын А.К. аттуу 48 жаштагы тургунунан үч айда кайтарып берем деп аталган суммадагы каражатын алып кеткен. Кепилдик катары төрт контейнердеги товарын көрсөткөн. Бирок айтылган мөөнөттө акчаны кайтарып бербестен из суутуп кеткен.
"2017-жылы "Алдамчылык" беренеси боюнча кылмыш иши козголгон. Тергөө жүрүп, Баткен райондук соту Ганиевди камакка алуу боюнча сыртынан өкүм чыгарып, шылуун издөөгө алынган. Баткен ОИИБдин криминалдык милиция кызматкерлеринин башка мамлекеттеги кесиптештери менен биргеликте иштөөсүнүн натыйжасында Ганиевдин алгач Россияда экени аныкталган. Андан соң Казакстандан Өзбекстанга качып, Фергана облусунун Маргалаң шаарында жүргөн жеринен кармалып, 2018-жылдын 19-декабрында экстрадицияланды", — деп айтылат маалыматта.
Милиция кармалган адамдан башка дагы жабыркагандар болсо, 03622 50226 же 102 номерине кайрылууну өтүнөт.