БИШКЕК, 9-янв. — Sputnik. "Кытай менен мамилени бузууну каалагандардын аракети ишке ашпайт". Мындай пикирин президент Сооронбай Жээнбеков бүгүн, 9-январда, Сокулук районунун жашоочулары менен болгон жолугушууда айтканын өлкө башчысынын маалымат кызматы билдирди.
Жээнбеков Кытай мамлекети Кыргызстанга макулдашууларга ылайык кредит-гранттарды берип жатканын, ал эми алар берип жаткан каражат кандай иштетилип жаткандыгы — бул мамлекеттин ички маселеси экенин белгиледи.
"Проблема биздеги мамлекеттик бийликте отургандарда болуп жатат. Биз менен кызматташып жаткан, жардам берип жаткан Кытай тарапка рахмат айтышыбыз керек. Саясатташтырып, эл аралык мамилелерди бузгусу келип, стабилдүүлүккө доо кетиргиси келгендер ким экендиги, алардын аракети көзөмөлдө. Мыйзамдын чегинде жоопко тартылат. Бийлик, мыйзам иштейт", — деди президент.
Ал ошондой эле бардыгына чара көрүлөрүн айтып, элди кабатыр болбоого чакырды.