Маршруттук таксилер жыл ичинде 190 миллион жүргүнчүнү тейлейт. Бул жалпы жүргүнчүлөрдүн 75 пайызын түзөт. Мындай маалыматты Кубанычбек Жусупов Sputnik Кыргызстан радиосунун эфиринде маек куруп жатып айтты.
Анын сөзүнө караганда, жалпысынан жыл ичинде шаардын коомдук транспорту 230 миллион жүргүнчүнү тейлейт.
"Шаар тегерегинде 48 жаңы конуш бар. Алардын бардыгына чоң автобустар, троллейбустар барып, элди тейлей албайт. Ошондуктан кичи автобустар сөзсүз иштеши керек, жоюлбайт. Болгону аларды шаардын борбордук бөлүгүнөн алуу иштери жүргүзүлөт. Бир жылда коомдук транспорттун кызматын колдонгондор 230 миллион адамды түзөт. Ал жүргүнчүлөрдүн 75 пайызын кичиавтобустар тейлейт. 13 пайызына троллейбус, 12 пайызына автобустар кызмат көрсөтөт", — деди Жусупов.
Ошондой эле ал маршруттук таксилердеги жол акы 2012-жылдан бери өзгөрүүсүз болуп келгендигин айтып, ал жагдай Жүргүнчү ташуучулар ассоциациясынын нааразычылыгын жаратып жаткандыгын кошумчалады.