БИШКЕК, 1-янв. — Sputnik. Чүй облусунун милициясы кышында тоодо эс алуу учурунда адистештирилбеген баллон жабдыктарынын кооптуулугун айтып берди.
Милиция кышында тоодогу эс алуу коопсуздук эрежелерин сактабагандыктан кайгылуу окуяга кептеши мүмкүн экендигин эскертет. Жаракаттын эң көп кездешкен себеби — резина баллон менен тоодон ылдый түшүү. Ошондой эле тоо лыжа базаларынын медицина кызматкерлери менен инструкторлору баллондор адам өмүрүнө кооптуу экендигин эскертишет. Анткен менен оюнга кызыккандар арбын, өзгөчө баллон бишкектиктердин эрмегине айланган.
"Тоодон жаракат алган он кишинин бир-экиси гана лыжа тээп жүрүп кырсыктаган. Калгандары — баллондун курмандыгы. Алар өздөрү жүрүп баратып оодарылып кетишкен же аларды баллончон адам келип сүзгөн. Бул буюмду башкарууга, убагында токтотууга жана жол кыймылын өзгөртүүгө мүмкүн эмес. Катуу ылдамдыкта мындай нерсе бийик көтөрүлүп туруп, ылдый түшөт. Жерге ар убак жумшак түшкөнгө болбойт", — деп айтылат маалыматта.
Баллон менен жылгаяк тебүү сунушталбайт, анткен менен шаардыктар кышкы эс алууну ал жок элестете албайт.
Чүй облусунда кышкы эс алууга ыңгайлуу жерлер арбын.
Сиз бул материалдан КРдеги бардык тоо лыжаларынын дайын-дареги жана баасы тууралуу окуй аласыз.