БИШКЕК, 29-дек. — Sputnik. Жаңы жылга карата борбор калаада 20 балаты орнотулду. Бул тууралуу мэриянын маалымат кызматы кабарлады.
Билдирмеге ылайык, 20нын ичине "Ала-Тоо" аянтына коюлган балаты кирбейт.
"Улуттук филармониянын алдына 18 метрлик, Академиялык опера жана балет театрынын алдына 10 метрлик балаты орнотулган", — деп жазылат маалыматта.
Мындан сырткары, Биринчи май районундагы Тоголок Молдо скверине, Горький атындагы паркка, Баят базарына, Дэн Сяопин менен Садыгалиев көчөлөрүнүн кесилишине жана Ак-Босого жаңы конушуна балаты коюлуп, кооздолду.
Ленин районуна караштуу Жал кичирайонуна, Фучик жана Чүй көчөлөрүнүн кесилишине, Жаш Гвардия бульварына балатылар орнотулуп, шаардыктарга жаңы жылдык маанай тартуулоодо.
Ал эми Свердлов районунун аймагына жаңы жылдык алты балаты орнотулган. Алар Абдрахманов жана Токтогул көчөлөрүнүн кесилишинде, №38 мектеп-гимназиясынын алдында, Муса Жангазиев атындагы куурчак театрынын астында жана Эне-Сай жаңы конушунда жайгашкан.