БИШКЕК, 27-дек. — Sputnik. Аалымдар кеңешинин кезектеги 6-жыйыны өтүп, анын алкагында Борбордук текшерүү комиссиясы отчет берип, аймактагы диний абал талкууланды. Бул тууралуу муфтияттын маалымат кызматы билдирди.
Анда 2017-2018-жылдары жүргүзүлгөн финансылык текшерүүнүн толук жыйынтыгы тааныштырылып, Аалымдар кеңешинин аймактарды кыдыруудагы багыттуу иштери талкууланды. Муну менен катар аймактардагы имамдардын ишмердүүлүгү жана коомчулук менен иш алып баруусу, отчеттуулукту жөнгө салуу жана иш кагаздардын жүргүзүлүүсүн карап чыгышты.
Жыйындын жүрүшүндө кеңештин мүчөлөрү аймактардагы диний кырдаалдан кабар берип, коомчулук арасында үй-бүлөлүк баалуулуктарды бекемдөө, эмдөө, экстремизм, терроризмдин алдын алуу боюнча түшүндүрүү иштери жүрүп, жергиликтүү бийлик органдары менен жолугушуулар уюштурулгандыгын айтышты.
Жыйындын соңунда Кыргызстан мусулмандарынын дин башкармалыгына бир катар тапшырмалар берилсе, Борбордук текшерүү комиссиясынын ишине "канаттандыраарлык" деген баа коюлду.