БИШКЕК, 24-дек. — Sputnik. Жети-Өгүз райондук ооруканада бир жарым жаштагы наристе чарчап калганын Sputnik Кыргызстан агенттигине Ысык-Көл облустук ИИБдин маалымат катчысы Сталбек Усубакунов билдирди.
Окуя кечээ, 23-декабрда, болгон. Ооруканага Светлая поляна айылынан 2017-жылы төрөлгөн наристени алып келишкен. Анын денесинде көгала тактар болгон.
"Жети-Өгүз РИИБинин нөөмөт бөлүмүнө ооруканадан телефон чалышып, денесинде көгала тактары бар наристе түшкөнүн кабарлашкан. Бир нече убакыттан кийин бала чарчап калган. Наристени энесинин 40 жаштагы эжеси багып келгени аныкталды", — деди Усубакунов.
Тергөө учурунда 21 жаштагы аял 2016-жылы күйөөсү менен ажырашып, 2017-жылы төрөп, үстүбүздөгү жылдын 12-декабрында баласын эжесине таштап Россияга иштегени кеткени аныкталды.
Аталган факты боюнча Кылмыш-жаза кодексинин 234-беренеси ("Бейбаштык, өспүрүмгө зомбулук көрсөтүү") боюнча иш козголуп, медициналык экспертиза дайындалды. Анын жыйынтыгы чыкса, кылмыш иши 104-беренеге ("Аягы адам өлүмүнө алып келген, ден соолукка атайылап залака келтирүү") өзгөртүлүшү мүмкүн.
Шектүү убактылуу кармоочу жайга киргизилип, тергөө амалдары уланууда.