БИШКЕК, 24-дек. — Sputnik. Премьер-министр Мухаммедкалый Абылгазиев балдарга карата зомбулукту алдын алуу маселеси боюнча кеңешме өткөрдү. Бул тууралуу өкмөттөн маалымдашты.
Өкмөт башчы компетенттүү мамлекеттик органдарга зомбулукту алдын алуу боюнча чараларды күчтөндүрүүнү тапшырды.
"Биринчи кезекте үй-бүлө институтун чыңдоо жана өнүктүрүү, үй-бүлөлүк мамиледеги руханий салттардын сакталышы, ошондой эле балдардын укугун жана кызыкчылыктарын камсыздоо маселеси боюнча калктын маалыматын жогорулатуу боюнча ишти жүргүзүү маанилүү. Алдын алуу иш-чараларын күчөтүп, орун алган фактыларга ыкчам жооп кайтаруу керек. Ошондой эле мындай кылмыштарга барган жактардын гана эмес, компетенттүү органдардын тийиштүү кызматкерлеринин, анын ичинде укук коргоо органдарынын аракетсиздиги жана жоопкер мамилеси үчүн кылмыш жоопкерчилигин катаалдатуу зарыл", — деди премьер.
Премьер-министр райондук штабдардын ишин жандандырууну жана аларды шаар мэрлери менен райондук администрация башчыларынын көзөмөлгө алуусун тапшырды.
Өкмөт башчы ошондой эле укук коргоо органдарына балдарга карата зомбулук көрсөтүү боюнча акыркы фактыларды тыкыр иликтеп чыгууну жана күнөөлүү жактарга мыйзам алкагында катуу чараларды көрүүнү тапшырды.
Белгилей кетсек, буга чейин Ысык-Көл облусуна караштуу Жети-Өгүз райондук ооруканасына денесинде көгала тактары бар наристе түшкөнү маалымдалган. Бир нече убактан кийин бала эсине келбей реанимация бөлүмүндө чарчап калган.
Суракка алынган 40 жаштагы аял баланы ага сиңдиси таштап кеткенин айткан. Ал ошондой эле наристе шымына сийип койгону үчүн чыбык менен чаап, чымчып койгонун моюндаган.