БИШКЕК, 19-дек. — Sputnik. Президент Сооронбай Жээнбеков бир туугандары эмне иш кыларын кабарлап, санап жана кудалары менен мамилесин айтып берди.
Жээнбеков учурда 2018-жылдын жыйынтыгы боюнча маалымат жыйынын берип жатат.
Журналисттер мамлекет башчыдан анын бир туугандары эмне иш кыларын сурашты.
"Эл башынан эки ыңкылапты өткөрдү, андыктан бир туугандарым да тынчсызданып жатат. Биз 11 элек, учурда сегизибиз калдык", — деди Жээнбеков.
Ал маалымат жыйында бир туугандарын санап, эмне иш кыларын айтып берди:
— улуу бир тууганы Кантөрө — илимдин доктору, 24 жыл ректор болуп иштеген;
— улуу эжеси — математик жана физик, учурда пенсияда;
— дагы бир эжеси дарыгер. Учурда Бишкектеги бейтапканалардын биринде эмгектенет;
— агасы Жусупбек — учурда Украинада элчи. Ал Сооронбай Жээнбеков президент болгондон кийин " Кыргызстанга келгенден тартынып" калганын айтты;
— бир иниси жаш кезинде эле каза болуп калган;
— бир карындашы дипломаттын келинчеги;
— иниси Асылбек Жээнбеков Жогорку Кеңештин спикери болгон;
— дагы бир карындашы ишкерлик менен алектенет;
— эң кичүү иниси атасынын чарбасын карап айылда.
Президент, мындан сырткары, кудалары тууралуу айтып, алар менен сый экенин, жакышылык-жамандыкта гана жолугуп, балдары тууралуу гана сүйлөшөрүн айтты. Анын айтымында, кудалары менен бийлик тууралуу талкуу болбойт.
Буга чейин Sputnik Кыргызстан Жээнбеков туурасында 10 факты даярдап, туугандары тууралуу маалымат берген.