БИШКЕК, 19-дек. — Sputnik. Ноокатта Daewoo Matiz үлгүсүндөгү унаа жолдо токтоп турган жүк ташуучу унаага урунду. Бул тууралуу Ош ЖККБдан кабарлашты.
Маалыматка караганда, жол кырсык Ош — Исфана унаа жолунун 24-чакырымында, Өсөр айылынын аймагында 18-декабрь күнү саат 23.00дөр чамасында болгон.
"Daewoo Matiz батышты көздөй баратып жолдо бузулуп турган жүк ташуучу унаага урунган. Машинада 86 жаштагы карыя жана анын 57 жаштагы уулу болгон", — деп айтылат маалыматта.
Жол кырсыктын кесепетинен карыя ошол жерде мерт болсо, уулу ооруканадан көз жумган. Топтолгон материалдар Ноокат райондук тергөө бөлүмүнө жөнөтүлүп, экспертизалар дайындалды.