Жогорку Кеңештин депутаты Зарылбек Рысалиев экс-президент Алмазбек Атамбаев менен азыркы президент Сооронбай Жээнбековду ынтымакка чакырып, кайрылуу жасады.
Ал келген президент менен кеткен президенттин мамилеси боюнча пикирин билдирип коюуну туура тапкандыгын айтты.
"Кайрылуумду улуулата баштасам. "Манаста" "бөлүнбө кыргыз" деген сөз айтылган эмеспи. Бүгүн бул баалуулуктарды кармабай калдыкпы? Бизге бүгүн өзүңүз айткан Абыке, Көбөштүн кылган бузукулук иштерин аныктап, бир жеңден кол, бир жакадан баш чыгарбайлыбы. Бул келген жана кеткен президенттердин колунда".
"Сиз кезегинде эң жакшы иштерди жасадыңыз. Аккуланы берип, ага жаңы келген президентти мингизип, бирок эки тизгин бир, чылбырды бербей жатканыңыз кандай болот, Алмаз Шаршенович? Бул сиздин айкөлдүгүңүз эмес го. Бул туура эмес болгонсуп жатат. Камчысын, батасын да бербейсизби. Кечүү тандап калдыңызбы, бийигирээк болбойсузбу…" — деген депутат.
Ал эми Жээнбековго кайрылып, Атамбаевге Кыргыз Республикасынын Эл баатыры наамын берүүнү сунуштаган.
"Сиз алдыңкы алты жыл ичинде кыргыздарга Манас ордуна Манас болуш үчүн келдиңиз. Бул убакыт ченемдүү, көз ачып жумганча өтүп кетчү нерсе. Бүгүн жакшы иштерди баштадыңыз. Коррупция менен күрөшүүдө жакшы иштерди жасап жатасыз… Алмазбек Шаршеновичке Указыңыз менен айткан сөзүңүз бар эле, балким, ошону орундатарсыз. Жаңы жылда аны чакырып алып, төшүнө төшүңүздү тийгизип, Кыргыз Республикасынын Эл баатыры наамын ыйгарат чыгарсыз. Бири-бириңерди кечиргенге мезгил келип жетти го. Муну элдин баары күтүп жатат", — деген.
Буга чейин Атамбаев Жээнбеков менен элдешүү үчүн кандай аракет кылганын айткан.
Атамбаев буга чейин бийликке, Сооронбай Жээнбековго сунуш катары айтылган пикирлери эске алынбай, азыркы бийлик коррупция менен күрөшүп жаткандай түр көрсөтүп, саясий оппоненттерди жок кылуу менен алектенип жатат деген оюн айткан жайы бар.
Ал эми кийинчерээк президент Жээнбеков Атамбаев менен эмнеге чырдаша кеткенин айтып берген. "КСДПнын съезди учурунда мени коррупция жана ТЭЦтеги авария боюнча күнөөлөдү", — деген ал.
Жээнбеков 2009-жылы президенттике КСДПдан талапкер болуп чыккан Атамбаевдин штабын жетектегенин, ошол учурдагы режимден коркуп аны колдогондор жокко эсе болгонун белгилеген.