БИШКЕК, 18-дек. — Sputnik. Белгилүү россиялык космонавт Сергей Рязанский Кыргызстандын бийик тоолорунун бири болгон Хан-Теңир чокусунун сүрөтүн жарыялады.
Сүрөттү социалдык тармакка жүктөп, автор Хан-Теңирдин мааниси тууралуу да жазган. Ажайып ирмем космос станциясында кадимки камеранын жардамы менен тартылган.
Сергей Рязанский — россиялык космонавт, Россиянын баатыры наамына ээ. 28-июлдан бери эл аралык космостук станцияда. Социалдык тармактагы баракчаларына Жер орбитасынан тартылган уникалдуу сүрөттөрдү жарыялап турат.
Хан-Теңир Ысык-Көлдөн түштүктү көздөй кеткен тарапта, Казакстан жана Кытай менен чектешкен аймакта жайгашкан. Бийиктиги 7010 метр. Борбордук Азиядагы бийиктиги 7000 метрден ашкан беш чокунун бири.
Буга чейин Рязанский Ысык-Көлдүн космостон көрүнүшүн тартып алып суктанткан.