БИШКЕК, 18-дек. — Sputnik. Кыргызстандын коргоого алынган аймактарында сейрек кездешкен жаныбарлар менен чымчыктардын саны көбөйө баштады. Бул тууралуу Айлана-чөйрөнү коргоо жана токой чарба мамлекеттик агенттигинин маалымат кызматынан билдиришти.
Ведомство "Хан Теңири" жаратылыш паркы менен "Ысык-Көл" коругуна коюлган фотокапкандардан сүрөттөрдү алды.
"Ысык-Көл" коругунан 300гө жакын өсүмдүк, Кызыл китепке киргизилген 200дөй чымчык жана 25 жаныбардын түрүн көрүүгө болот.
"Сүрөттөрдү көрүп таң калдык. Андан сейрек кездешип калган жаныбарлар менен канаттуулардын көбөйүп калганын байкоого болот", — деп айтылат билдирүүдө.
Жыл сайын Кыргызстанга канаттуулардын 350дөн ашык түрү учуп келет. Бирок мурда жапайы жан-жаныбарларды, өзгөчө ак илбирсти көрүү татаал болуп калган.
"15 жыл мурда ак илбирс жоголуп кетүү коркунучуна кептелсе, азыр анын популяциясы калыбына келип калды деп айта алабыз", — деп айтылат билдирүүдө.
Ал эми "Хан Теңири" жаратылыш паркында Кызыл китепке кирген чымчыктардын 200, жаныбарлардын 25 түрү бар.