БИШКЕК, 16-дек. — Sputnik. "Бишкекжашылчарбасынын" аймагында чыккан өрттү көргөн күбөлөр ал атайылып коюлушу мүмкүн дешүүдө. Анткени бир убакытта үч жерде жалын тутанган. Бул тууралуу Бишкек мэриясынан билдиришти.
Аталган муниципалдык ишкананын аймагында өрт 16-декабрга караган түнү чыккан. Алдын ала маалымат боюнча жалын миңден ашык чарчы метр жерге жайылган. Өрт таңкы саат 5:28де чектөөгө алынган.
Мэрия тараткан маалыматка ылайык, жер семирткич үчүн даярдалган жалбырактар, бактын бутактары күйгөн.
"Өз алдынча өрт чыкты деген версия туура келбейт. Анткени жалбырактар менен бутактар чириши үчүн кеминде үч жылдан ашык нымдуу болуп турушу керек", — деп айтылат маалыматта.
"Бишкекжашылчарба" муниципалдык ишканасынын башчысы Элнура Жолдошеванын айтымында, өрт чыккан жерде кургак чөп жок. Ал өрттү билген эле киши койду деп шектенүүдө.
Кырсык болгон жерде тергөөчүлөр иштеп жатат. Алар өрттү көргөндөрдү жана ал жакка жакын жашаган тургундарды сурашты. Жолдошева ошондой эле өрт ишкананын жумушуна кедергисин тийгизбей турганын кошумчалады.