Министрдин кайрылуусу YouTube каналына жайгаштырылган.
"Ушундай нерсенин болуп кетээрин билип, ага карата алдын ала чараларды көргөн жокмун. Бир адамдын кылган мыйзамсыз ишинен жалпы Транспорт министрлигиндеги ак, өз эмгеги менен чын дилинен иштеп келген адамдардын бардыгына көө сыйпалып калгандыгына байланыштуу өзүмдүн коллективимден кечирим сурайм. Мындай болушу керек эмес эле. Себеби биз акыркы жылдары министрликке реформалоо боюнча, коррупциялык схеманы азайтуу, ошол жердеги адамдык факторлорду жоюу боюнча көп жумуштарды аткарып келгенбиз. Ал улана бермекчи, коллектив бар, жумуш алдыга жылат деген чоң үмүтүм бар", — деген Калилов.
Ал орун басары Азимкан Жусубалиевдин коорупциялык иштер боюнча кармалаары оюна келбегендигин айткан.
Ал келечекте ишсиз калбастыгын айтып, бул тармакта 34 жылдан бери иштеп келе жаткандыгын кошумчалаган.
Эске салсак, Транспорт жана жолдор министрлигинин орун басары Азимкан Жусубалиев 50 миң доллар пара менен кармалгандан кийин Жээнбеков Калиловду сындап, оставкасы тууралуу айткан.