БИШКЕК, 30-ноя. — Sputnik. Бишкек шаарында кызды зордуктоого аракет кылган деген шек менен кармалган таксист Октябрь райондук сотунун чечими менен №1 тергөө абагына эки айга камакка алынды. Бул тууралуу шаардык милициянын маалымат кызматы билдирди.
Эскерте кетсек, 27-ноябрда Instagram тармагына Honda Fit унаасынан кызды түшүрбөй ыйлатып жаткан таксист тууралуу видео жарыяланган. Жардамга келген кишилерди көрүп, жүргүнчү кыз унаадан түшүп чуркап кеткендиктен окуянын чоо-жайын билүүгө мүмкүн болгон эмес.
Кийин Бишкек шаардык милициясы 49 жаштагы айдоочуну кармаган. Окуя 24-ноябрь күнү түнкү саат 1.30дар чамасында шаардын түштүк тарабындагы кичирайондордун биринде болгон.
Аталган факты боюнча "Зордуктоого аракет жасоо" беренеси боюнча кылмыш иши козголгон.