БИШКЕК, 28-ноя. — Sputnik. Кыргызстанда 2012-жылдын 3-августуна чейин өзүм билемдик менен каалаган тилкеге курулуп калган үйлөрдү мыйзамдаштыруу сунушталууда. Мындай документти Жогорку Кеңештеги "Ата Мекен" фракциясынын сегиз депутаты иштеп чыкты.
Мыйзамды иштеп чыккандар мэрия берген маалыматтарга таянып, учурда мыйзамдаштыра турган 3,6 миң жер тилкеси бар экендигин айтышты.
Депутаттар жерге ээлик кылган документтери болбогондуктан, жашоочулар бери дегенде эле медициналык жактан тейлене албагандыгын баса белгилешти.
Демилгечилер Бишкекте өзүм билемдик менен 1999-жылга чейин үй куруп алгандардын турган жери мыйзамдаштырылгандыгын айтышты. Анткен менен мындай курулуштардын арбыны 2005-жылы түшкөн. Ал эми мамлекеттик органдардын буларды мыйзамдаштырууга ыйгарым укугу жок.
"Социалдык чыңалууну, басып алган жерге салынган үйдү мыйзамдаштырууга жана ушунча сандагы турак жайларды түрттүрүп салууга мүмкүн эместигин эске алуу менен бул мыйзам долбоорун кароону сунуштайбыз", — деп айтылат негиздеме-маалымкатта.
Депутаттар эмне үчүн мындай документти иштеп чыккандыгын төмөнкүчө чечмелеп беришти:
— Өзүм билемдик менен тургузгандар шылуун сатуучуларга алданып калгандыгы менен (себеби алар жер участкаларын райондук администрациялардын токтомдорунан жасалма көчүрмөлөрдүн негизинде акчага сатып алышкан) түшүндүрүшкөн.
— Өзүм билемдик менен басып алуулардын дагы бир бөлүгү жарандардын Бишкек жана Ош шаарларында турак жай сатып алууга мүмкүнчүлүгү жоктугунан келип чыккан. Эптеп чогулткан акчасына үй тургузуп алышкан, бирок аларды мыйзамдаштыруу тиешелүү ченемдик-укуктук актыларды кабыл алууга чейин мүмкүн эмес.
— Бишкек жана Ош шаарларында өзүм билемдик менен жеке турак үйлөрдү салып алган жер участокторун мыйзамдаштыруу көйгөйү чечилбеген бойдон калууда. Бул борбор калаада жана Ош шаарында калктын нааразычылыгына алып келип, митинг өткөрүү, автоунаа жолдорун тосуу менен коштолууда.