БИШКЕК, 26-ноя. — Sputnik. Бишкек мэриясы шаардыктар арасында жаңы жылга карата жасалгаланган эң кооз район, конуш жана имарат боюнча сынак жарыялады.
Муниципалитет уюштурган бул сынак 1-декабрдан тарта 31-декабрга чейин уланат. Ага катышууну каалагандар өзү жашаган райондун администрациясына арыз менен кайрылышы зарыл.
Номинациялар:
— Мыкты кооздолгон район. Биринчи орунга — 50 миң, экинчиге — 40 миң, үчүнчүгө — 30 миң сомдон сыйлык каралган;
— Мыкты кооздолгон жаңы конуш. Жергиликтүү аймактык башкармалыктары тарабынан 30 миң сомдук төрт сыйлык каралган;
— Мыкты кооздолгон короо. Жергиликтүү аймактык башкармалык тарабынан 20 миң сомдук төрт сыйлык берилет.
— Министрлик жана административдик ведомстволордун мыкты кооздолгон аймагы. Биринчи орунга — 50 миң, экинчиге — 40 миң, үчүнчүгө — 30 миң сомдон сыйлык каралган;
— Соода борборлорунун мыкты кооздолгон фасады. Биринчи орунду алгандар— 100 миң, экинчи — 70 миң, үчүнчү — 50 миң сомго ээ болот;
— Соода-сатык, кызмат көрсөтүү жана кеңселердин мыкты кооздолгон фасады. Биринчи орун — 70 миң, экинчи — 50 миң, үчүнчү — 30 миң сом менен сыйланат.
Ошондой эле 1-2 мүнөткө созулган жеке жана жамааттык видео куттуктоо жана "Жаңы жылың менен, сүйүктүү шаарым!" темасында селфилерге сынак жарыяланат.