БИШКЕК, 22-ноя. — Sputnik. Укук коргоо органдарынын өкүлдөрү мал уурдоого шектелген кишини "Манас" аэропортунан кармашкан. Бирок шектүү качып кетүүгө үлгүргөн. Бул тууралуу ИИМден маалымдашты.
Жалал-Абад облусуна караштуу Сузак районунда туулган 50 жаштагы киши мал уурулугуна шектелип, райондук милиция тарабынан изделип жаткан.
"Чек арачылар аны 20-ноябрь күнү Россиядан учуп келгенде кармап, аба транспорту боюнча ички иштер башкармалыгынын өкүлдөрүнө өткөрүп беришкен. Шектүү аэропорттогу атайын бөлмөгө киргизилген, бирок 21-ноябрь күнү эртең менен качып кеткени белгилүү болгон", — дешти милициядан.
Ошондой эле Ички иликтөө кызматынын өкүлдөрү шектүү кандайча качып кеткенин иликтөөдө. Анын жыйынтыгына жараша колго түшкөн кишини аэропорттун атайын бөлмөсүнө жайгаштырган укук коргоочулардын ишине баа берилет.