БИШКЕК, 20-ноя. — Sputnik. Эңилчек өрөөнүнө коюлган фотокапканга үч мамалагын ээрчиткен аюу түшүп калганын Германиянын Жаратылышты коргоо союзунун (NABU) Кыргызстандагы өкүлчүлүгүнүн маалымат катчысы Зарина Эсенбаева билдирди.
Анын айтымында, фотокапкан деңиз деңгээлинен 3878 метр бийиктиктеги жерге коюлган.
"Ушу тапта июлда эки жума бою жүргүзүлгөн иликтөөнүн маалыматтары иштелип жатат. Ал экспедиция учурунда тоолорго жана Сары-Жаз, Эңилчек, Кайыңды аймагына 35 фотокапкан коюлган. Сүрөткө тоодо жүргөн аюулар жана бир ак илбирс түшүп калган", — деди Эсенбаева.
Ал ошондой эле иликтөөнү NABU-Кыргызстандын мониторинг бөлүмү "Хан-Теңир" мамлекеттик жаратылыш паркындагы кесиптештери менен биргеликте жүргүзгөнүн белгиледи.