БИШКЕК, 19-ноя. — Sputnik. Бишкекте парламент имаратынын алдына 20га жакын үй-бүлөлүк дарыгер митингге чыкты.
Алар үй-бүлөлүк дарыгерлер тобун кыскартууга жана саламаттык сактоо тармагында жасалып жаткан оптимизациялоого каршы экенин билдиришти.
Митингге чыккандардын бири Зууракан Жусуеванын айтымында, Бишкек шаары боюнча 19 үй-бүлөлүк дарыгерлер тобу бар экенин, оптимизациялоо максатында төрт районго бирден эле борбор калтырууга аракеттер болуп жатканын айтты. Андан сырткары, учурда терапевттер балдардын да доктуру, гинеколог да болуп иштеп жатканын билдирди.
"Азыр окууларга барып терапевттер педиатр, гинеколог да болобуз деп жүрөбүз. Андай болбойт да. Теорияны сегиз ай окуп койсоң эле дарыгер болуп кетпейсиң. Сегиз жыл бир багытта окуган менен сегиз ай курска баргандын айырмасы бар да. Мына октябрдан баштап айлыгыңар көтөрүлөт деген, бирок көтөрүлгөн жок. Андыктан азыр жүрүп жаткан реформага жана оптимизацияга каршыбыз", — деди ал.
Нааразычылыгын билдиргендерди Жогорку Кеңештин социалдык маселелер, билим берүү, илим, маданият жана саламаттык сактоо боюнча комитетинин төрайымы Гүлкан Молдобекова кабыл ала турган болду. Учурда митингге чыккандар ичинен 5-6 кишини тандап, алар эл өкүлү менен жолугат.