Бишкектеги көп кабаттуу үйлөрдүн бириндеги батирден "Тазалык" ишканасы таштанды чыгарып жатат. Бул тууралуу Sputnik Кыргызстан агенттигинин кабарчысы жеринен билдирди.
Кабарчынын айтымында, 3-кабатта жашаган 80 жаштагы экинчи топтогу майып кемпир 3 бөлмөлүү батирине таштанды алып келип жыйнаган. Ал батиринин эшигин көпкө чейин ачкан эмес. Окуя болгон жерге аймактык милиция менен "Тазалык" ишканасынын өкүлдөрү да келген.
"Батирдин кире бериши тазаланды. Ал жактан эки машина таштанды чыкты. Кемпир "Тазалыктын" кызматкерлери акыр-чикирди чыгарып жатканда "дүнүйөмө тийбегиле, өзүм алып чыгам" деп кыйкырды. Батирди тазалап жаткандар дагы 8 машина таштанды чыгат деп жатышат. Милиция кызматкерлери жеринде акт түзүштү", — деди ал.
Таштанды арасында 5, 10 номиналындагы тыйындар менен майда акчалар да чыгып жатканын, алардын бардыгы саналгандан кийин үй ээсине берилерин укук коргоо органдары айтышкан.
Былтыр, 2017-жылы, "Тазалык" кызматы калаа тургунунун үйүнөн үч машина таштанды чыгарган.