БИШКЕК, 19-ноя. — Sputnik. Бишкектин мэриясы Тез жардам кызматына 9 автоунаа берди. Бул тууралуу муниципалитеттин маалымат кызматы билдирди.
Ага ылайык, машиналар жергиликтүү бюджеттин эсебинен алынган.
"Автоунаанын алтоо керектүү дарылоо-диагностикалык жабдуу менен жабдылган. Эки машина сүт азыктарын ташууга ыңгайлашса, бир автоунаа шаардагы социалдык коргоо кызматына берилет", — деп айтылат маалыматта.
Жаңы автоунаалар Россияда чыгарылган, ал шаардагы №1, 2, 3 подстанцияларга жана Тез жардам кызматынын борбордук подстанциясына берилет.
Бишкек шаарынын социалдык-экономикалык өнүгүү планына ылайык, жергиликтүү бюджеттин эсебинен жылына 7-8 автоунаа сатып алынат. Алардын саны 100гө жетиши керек.
Учурда шаардыктарды Тез жардам кызматынын 39-40 автоунаасы тейлейт.