БИШКЕК, 17-ноя. — Sputnik. Бишкек ШИИБи туристтик милициянын катарына эл ичинен кызматкер алууну уланта турганын мекеменин маалымат кызматы билдирди.
ИИМдин буйругу менен атайын ротанын курамында 62 адамдан турган эки туристтик взвод түзүлөт. Анын экөө командир болсо, калган 30у — инспекторлор.
Туристтик взводдун милдеттери:
— борбор калаага келген чет элдик меймандар менен туристтердин коопсуздугун камсыздоо, аларга укуктук жактан жардам берүү;
— туристтер көп барган жайларды көзөмөлдөө;
— кеп-кеңеш берүү;
— туристтерге карата болгон кылмыш иштерге жана ар кандай укук бузууларга тез реакция жасоо;
— Маданият, маалымат жана туризм министрлигинин алдындагы Туризм департаменти жана туристтик агенттиктер менен иштешүү.
Түзүлгөн тандоо комиссиясына 59 талапкер арыз таштап, 20 киши тандалып алынды. Анын 12си — учурда иштеп жаткан кызматкерлер болсо, бешөө— офицер, жетөө — кичи башкаруучу курамдын өкүлдөрү. Дагы сегиз киши документ тапшырып жатат. Үчөө түрк тилин билсе, бирөө немис тилинде, дагы 16 киши англис тилинде эркин сүйлөйт.
Талаптар:
— жогорку билим;
— 35 жашка чейинки курак;
— өзү жана жакын туугандары соттолбогон болушу керек;
— эркектердин бою 170 сантиметрден, аялдардыкы 168 сантиметрден кыска болбошу шарт;
— чет тилин билүү;
— аскер билети.
Кошумча маалымат алуу үчүн Бишкек ШИИБинин кадрлар бөлүмүнө Васильев шоссеси, №1 дареги же (0312) 34-54-98, (0703) 93-11-53, (0707) 90-77-11 телефондору аркылуу кайрылууга болот.