БИШКЕК, 16-ноя. — Sputnik. Президенттик шайлоо алдында Сооронбай Жээнбековдун штабын жетектеген Фарид Ниязов үгүт иштери учурунда анын алган акчасы тууралуу социалдык тармактарга тараган маалымат чын экенин айтты. Бул тууралуу КСДПнын маалымат кызматы билдирди.
Ага ылайык, Ниязов штабды жетектеп, анын ишин тескегенин белгилеген. Бирок үгүт иштерин каржылоо анын милдетине кирбегенин, каржы жагын президенттикке талапкер штабдагы эки жооптуу киши менен талкуулап турганын кошумчалады.
"Биз материалды тыкыр иликтеп жатабыз. Жарыяланган документтеги иш-чаралар менен фамилиялар туура. Күндөрү дал келип жатат. Анын ичинде мен тууралуу жазылгандар да туура. Башка күндөр, сандар жөнүндө аты аталган кишилерден сураш керек. Мен жетектеген штаб шайлоо мыйзамынын алкагында гана иш алып барган", — деди ал.
Ниязов ошондой эле алардын ишине юристтер, БШК жана президенттикке талапкерлердин штабы көз салып турганын айткан.
Эскерте кетсек, мыйзам боюнча талапкер шайлоо өнөктүгүнө жалпы жонунан 165 миллион сомго чейинки каражат жумшай алат. Социалдык тармактарга тарап жаткан документте Жээнбековдун жумшаган суммасы 1 миллиард 170 миллион 265 миң 187 сом жана 7 миллионго чукул долларды түзгөн.
Президенттик шайлоо 2017-жылдын 15-октябрында өткөн. Анда КСДПдан чыккан талапкер Сооронбай Жээнбеков жеңишке жетишип, 24-ноябрдан тарта кызматка киришкен.