БИШКЕК, 15-ноя. — Sputnik. Борбор калаада таштанды ташыган унаа троллейбус мамысын сүзүп, коомдук транспорттун линиясын бузуп алган. Бул тууралуу Sputnik Кыргызстан маалымат агенттигине күбө билдирип, кырсыктын сүрөтүн редакциянын WhatsApp номерине жөнөткөн.
Анын айтымында, окуя Лев Толстой менен Термечиков көчөлөрүнүн кесилишкен жеринде катталган.
Бишкек шаардык Жол кыймылы коопсуздугун камсыздоо башкы башкармалыгы (ЖКККББ) аталган фактыны тастыктады.
"Кырсык 15-ноябрь күнү болжол менен эртең мененки саат 8:00дөрдө катталган. Окуя болгон жерге ЖКККББ кызматкерлери барган. Жабыркагандар катталган эмес, машина атайын унаа токтотуучу жайга жеткирилди. Чогултулган материалдар тергөө бөлүмүнө өткөрүп берилет", — деп жазылат маалыматта.
"Шаарда 20дай жеке ишкана бар. Кырсыкка кабылган унаа ошол ишканалардыкы болушу ыктымал", — дешти мэриядан.
Муниципалитет жол кырсыгынан жабыркаган линия калыбына келтирилгенин кошумчалады.