БИШКЕК, 12-ноя. — Sputnik. Чүйдүн Жайыл районундагы милиция бөлүмүндө өлтүрүлгөн Бурулайдын ишин кароо кийинки жумага жылдырылды. Сот Санжар Чотонов буга айыпталуучулардын биринин адвокаты бүгүн эртең менен колун сындырып алганы себеп экенин айтты.
"Балдардын биринин адвокаты эртең менен Жогорку сотко барып колун сындырып алыптыр. Азыр гипс салып үйүндө экен. Андыктан жактоочусу жок ишти карай албайбыз", — деди Чотонов.
Эске салсак, 2018-жылы 28-майдын түнүндө 30 жаштагы киши Чүй облусуна караштуу Жайыл районунун ички иштер бөлүмүндө ала качып алган кызын бычактап, кийин өзүнө да кол салган. Кыз алган жараатынан улам каза болуп, эркек киши ооруканага түшкөн.
Окуядан кийин Чүй милициясынын жетекчиси жумуштан айдалып, укук коргоо органдарынын башка кызматкерлерине дисциплинардык чара көрүлгөн.