БИШКЕК, 7-ноя. — Sputnik. UFC уюмунун жеңил салмактагы чемпиону Хабиб Нурмагомедовго жана анын атасы, машыктыруучусу Абдулманап Нурмагомедовго Дагестандын башчысы Владимир Васильев мамлекеттик сыйлыктарды тапшырды. Бул туурасында РИА Новости жазды.
Көп өтпөй бир катар чет элдик ЖМКлар Дагестандын башчысы Васильев Нурмагомедовго жардамчы болууну сунуштаганын жазышып, атүгүл Нурмагомедов бул маселе кийинки жолугушууда кенен талкуулана турганын билдиргенин айтышкан.
Анткен менен мушкер социалдык тармактагы баракчасына жолугушуудагы сүрөттөрдү гана жүктөп, Васильевге берген наамдары үчүн ыраазычылык билдирген.
Нурмагомедов 7-октябрда ирландиялык Конор Макгрегорду жеңип, UFC уюмундагы чемпиондук наамын коргоп калган. Мушкер ММА боюнча 27 мелдештин жеңүүчүсү.