БИШКЕК, 5-ноя. — Sputnik. Сокулук районуна караштуу Шопоков шаарында жаңы форматтагы Калкты тейлөө борбору ачылды. Бул тууралуу Мамлекеттик каттоо кызматынан кабарлашты.
Мекеме — Чүй облусундагы райондук масштабдагы биринчи Калкты тейлөөчү борбор. Мамкаттоодон билдиришкендей, буга чейин паспорт менен ЖААКка (ЗАГСка) тийиштүү бөлүмдөр башка-башка имараттарда жайгашып, жарандар менен кызматкерлер үчүн эч кандай шарты болгон эмес.
Жаңы борбордун аянты 800 чарчы метрди түзүп, капиталдык ремонт жасалган. Ошондой эле унаа жана велосипед токтотуучу жайлар дагы курулган.
Имаратта сурап-билүү, күтүү, документтерди кабыл алуу жана башка кошумча кызматтарды көрсөткөн бөлүмдөрү бар. Борбор негизги трассадан 200 метр аралыкта жайгашкандыктан, Сокулук, Панфилов жана Жайыл райондорунун тургундары оңой жете алат.
Калкты тейлөөчү бул жаңы борбор аймактарды өнүктүрүү жылына карата ачылды.