БИШКЕК, 25-окт. — Sputnik. Грек-рим күрөшү боюнча кыргызстандык балбан Жоламан Шаршенбеков Венгриянын Будапешт шаарында өтүп жаткан дүйнө чемпионатынын финалына чыкты. Бул тууралуу Бүткүл Дүйнөлүк күрөш уюмунун сайтында айтылат.
Бүгүн грек-рим күрөшү боюнча курама командадан үч спортчу килемге чыкты.
Жоламан Шаршенбеков квалификациялык кармашында кореялык Хи Донг Сонду 9:0 эсебинде, чейрек финалда армениялык Хоряр Хакхоянды 11:0 упай менен утса, жарым финалда түркиялык Екрем Озтуркту 9:0 эсебинде жер каратып финалга чыкты. Эми ал эртең азербайжандык Элдани Азизли менен алтын үчүн күрөшөт.
Дагы бир балбан Урмат Аматов (63 килограмм) чейрек финалда утулуп, медаль аттудан кол жууду.
Эртең 60 килограмм салмак ченинде Калы Сулайманов күч сынашат.
Эскерте кетсек, Күрөш түрлөрү боюнча дүйнө чемпионаты 20-октябрда башталган, эми 28де аяктайт. Буга чейин КРдин кыз-келиндер арасындагы күрөш менен эркин күрөш боюнча курама командасы килемге чыгып, бир да медалга илине алган эмес.