БИШКЕК, 24-окт. — Sputnik. АКШнын Жашыруун кызматы экс-президент Барак Обама менен мамлекеттик мурдагы катчы Хиллари Клинтонго жиберилген бомбаны орто жолдон токтотуп, кармап калышты. Бул туурасында РИА Новости аталган кызмат тараткан маалыматка таянып кабарлады.
Буга чейин New York Times жөнөтүлгөн бомбалардын кармалып калышы туурасында жазган.
Шейшембинин кечинде Жашыруун кызмат Нью-Йорк штатынын Уэстчестер округуна Клинтонго жөнөтүлгөн шектүү аманатты байкап калган. Шаршемби күнү экинчи ошондой эле аманат Барак Обаманын резиденциясына жөнөтүлүп бара жатканда Вашингтондогу аталган кызмат тарабынан токтотулган.
"Оролгон нерселер стандарттуу текшерүүдөн кийин жарылуучу зат экени аныкталды. Эки аманат тең айтылган дарекке жетпей жолдон токтотулуп калды. Жашыруун кызматтын байкоосунда турган адамдарга багытталган буюмдар жетпегендиктен, алар тобокелчиликке кабылган жок", — деп айтылат маалыматта.
Жашыруун кызмат аманатты жөнөтүүчүлөрдү аныктоо үчүн кеңири масштабдагы иликтөөлөрдү баштады.
CNN Нью-Йоркто бомба кабарынан кийин Time Warner Center имаратындагыларды эвакуация кылуу жүрүп жаткандыгын кабарлады. Борбордун кызматкеринен сырткары CNN бюросун да коопсуз жайга чыгарып жатканын билдирди.