БИШКЕК, 20-окт. — Sputnik. 19-октябрь күнү Sputnik Кыргызстан агенттигинин кабарчылары Мамлекеттик тарых музейинин артындагы таштанды челектин жанынан милициянын баш кийимин таап алышкан.
Кийинчерээк кабарчылар Facebook баракчага баш кийимдин ээсин издеп, видео кайрылуу жүктөгөн.
Көп өтпөй редакциябызга ИИМ Жол кыймылы коопсуздугун камсыздоо башкы башкармалыгынын өкүлү Тилек Оторов келип, видеону көргөндөн кийин ЖКККББ жетекчилиги бул ишти өз көзөмөлүнө алганын айтты. Ал Бишкектин, Чүй облусунун бардык автоинспекторлорунан сураштырып чыкканын жана баш кийимин жоготкудай өлкөдө эч кандай деле кырсык болбогонун билдирди.
Оторовдун айтымында, фурашка эч кимге таандык эмес.
Ал ЖКККББнын жетекчилигинин алдында отчет бериш үчүн милициянын баш кийимин Sputnik агенттигинин кабарчыларынан алып кетти.