БИШКЕК, 17-окт. — Sputnik. Жогорку Кеңештин депутаты Улукбек Ормонов парламенттин жалпы жыйынында сот аткаруучулар алимент боюнча соттун чечимин аткарбай жатканын айтты.
Бүгүн депутаттар "Кыргыз Республикасынын Жарандык процесстик кодексине өзгөртүүлөрдү киргизүү жөнүндө" мыйзамдын долбоорун карашты.
Эл өкүлү Ормонов Жогорку соттун Сот департаментинин директору Рустам Ибраимовго кайрылып, учурда өлкө боюнча канча сот аткаруучу бар экенине кызыкты.
"Учурда 203 сот аткаруучу бар. Былтыр алимент боюнча 34 миң арыз түшкөн. Кайрылуулардын көп болуп жатышы миграцияга дагы байланыштуу", — деп жооп берди Ибраимов.
Эл өкүлү Айнура Алтыбаева соттун чечимин аткарбай койгондор кандай жазага тартылганына кызыкты. Ибраимов учурда 9 айдын жыйынтыгы боюнча отчеттор алынып жаткандыктан так маалымат жок экенин айтты. Ошентсе да быйыл өз милдетин так аткарбаганы үчүн бир башкармалыктын жетекчиси иштен алынганын белгиледи. Андан сырткары, өз ишин керектүү түрдө аткарбаганы үчүн кызматкер дисциплинардык жазага тартыларын, керек болсо иштен алынарын кошумчалады.