БИШКЕК, 17-окт. — Sputnik. Калифорния университетинин окумуштуулары глобалдык жылуулуктан жана жер шарындагы аба ырайынын көтөрүлүшүнөн улам арпа өскөн аймактар какырап кургап каларын болжошууда. Бул тууралуу Nature Plants журналына жарыяланды.
Мындай кургакчылык өз кезегинде сыранын элдин баарына жеткиликтүү болушуна жана баасынын асмандап кетишине түз таасир берет.
Эгер абанын температурасы акыркы 10 жылдагыдай тездик менен көтөрүлө берсе арпанын түшүмдүүлүгү 17 пайызга төмөндөйт. Эң пессимисттик эсептөөлөр боюнча учурда өндүрүлүп жаткан сыранын көлөмү 38 пайызга чейин азаят.
Белгилей кетсек, 2015-жылы 195 мамлекет Париж келишимине кол койгон. Алар 2100-жылга чейин жер шарындагы температураны 2 градустан жогору көтөрүүгө жол бербөө боюнча милдеттемелерди алган.