Ушул мезгил аралыгында мамлекет жетекчиси ар кайсы өлкөлөргө каттап, эл аралык аренада бир топ иштерди аткарды. Мындан улам Sputnik Кыргызстан агенттиги президенттин кесиптештери менен кол кысышканынан тарта БУУда сүйлөгөнүнө чейинки сүрөт түрмөгүн даярдады.
Жээнбековдун өлкө башчы катары алгачкы иш сапары Россияга болгон. Анда "жаңы башчыбыз кантээр экен?" деп, демин ичине кармап турган эл президенттин учактан чыгып келе жатканын көрүп эле таң калган. Анын өзүнө куп жарашкан пальтосу, кылычтай түз кармаган бою, салабаттуу келбети көпчүлүккө чындап эле жаккан болчу.
Сооронбай Жээнбеков менен Нурсултан Назарбаевдин Минск шаарында ЖККУнун кезектеги жыйынындагы жолугушуусу. Дал ушул кол алышуудан кийин кыргыз-казак чек арасындагы оор кырдаал жөнгө салынган.
Ал эми алгачкы расмий сапары менен Өзбекстанга барган. Анда ал өзбек лидери Шавкат Мирзиёевге "Данакер"орденин тапшырган.
Кыргызстан, Россия жана Казакстандын президенттеринин бул сүрөтү социалдык тармактарда кызуу талкууланган. Айрымдар Путин бир тууган эки элди элдештирүүнү көздөп жатыптыр деп айтып чыгышкан.
Апрель айында расмий сапар менен Түркияга, андан ары Бельгияга барган. Сапарлардын алкагында өлкө башчы түркиялык кесиптеши Режеп Тайип Эрдоган жана Евробиримдиктин жетекчилери менен сүйлөшүүлөрдү жүргүзгөн.
Сочи шаарында Жогорку Евразиялык экономикалык кеңештин жыйыны аяктагандан кийин президенттер калааны аралай басышкан.
Жээнбеков 24-26-сентябрда Америка Кошмо Штаттарынын Нью-Йорк шаарына барып БУУнун 73-сессиясына катышты. Сүрөттө перзиденттер жубайлары менен.
Башкаруусунун биринчи жылында эле Жээнбеков Бириккен Улуттар Уюмунун Башкы ассамблеясында сөз сүйлөгөнгө жетишти.
Жээнбеков Душанбеде КМШ мамлекеттеринин башчылары менен.
Ошол эле күндөрү Бириккен Улуттар Уюмунун баш катчысы Антониу Гутерриш менен жолуккан.