БИШКЕК, 12-окт. — Sputnik. Россиялык мушкер Хабиб Нурмагомедов UFC уюмун сынга алып, аны менен келишимди үзүп салышы мүмкүн экенин айтты. Спортчу билдирүүсүн 11-октябрь күнү өзүнүн Instagram баракчасына жарыялаган.
Мушкер буга чейин Конор Макгрегордун командасы автобуска кол салып, эки адам жаракат алганда UFC эч кимди жумуштан кетирбегенине нааразы болууда.
"Алар ошол жерден бирөөнү өлтүрүп алышы мүмкүн эле. Эмнеге менин мекениме, туткан диниме, улутума, үй-бүлөмө карата орой сөздөр айтылып жатканда эч ким унчукпайт? Эмнеге эки тарап бирдей мушташып жатса, менин гана командам жооп бериши керек. Урушту мен баштаган жокмун. Мен башталган нерсени гана аягына чыгардым", — деп жазды Нурмагомедов.
Анын айтымында, досу Зубайра Тухугов октагондо Макгрегорго кол салгандыгы үчүн UFC анын таймашын токтотуп салган.
Ошондой эле ал мелдештен кийин UFC бербей койгон 2 миллион доллар сый акысын "өзүңөр ала бергиле" деген оюн айтты.
"Байкагыла, ошол акча тамагыңардан өтпөй калбасын", — деген сөздөр менен Нурмагомедов постун аяктады.
Мындан соң UFC президенти Дана Уайт уюмдун мушкер Зубайра Тухугов менен түзүлгөн келишими калыбына келгис болуп бузуларын айткан.