БИШКЕК, 10-окт. — Sputnik. Жогорку Кеңештин депутаты Айнура Осмонова 2017-жылы 12 ветеринардык лаборатория куруу үчүн 163 миллион сом бөлүнгөнүн айтып, алар ISO эл аралык стандартына туура келеби деп суроо салды.
Парламентте учурда "Мамлекеттик сатып алуулар жөнүндө" КР мыйзамына өзгөртүү киргизүү тууралуу" мыйзамдын долбоорун карап жатат. Ал биринчи окууга киргизилет.
Осмонова ошондой эле ISO эл аралык стандартына жооп берүү үчүн ата мекендик өндүрүүчүлөр товарларын Ташкенттеги, Алматыдагы, Түркиядагы лабораторияларга жиберип жатканын айтты.
Ал эми Жогорку Кеңештин спикеринин орун басары Мирлан Бакиров бүгүнкү талкууга Ветеринардык кызматтын өкүлү келбегенин айтып, ага берилген маалымат боюнча Кыргызстанда эки гана лаборатория стандартка жооп берерин маалымдады. Калгандары аккредитациядан өтүү аракетин көрүп жатканын кошумчалады.