БИШКЕК, 5-окт. — Sputnik. Өкмөттүн Нарын облусундагы ыйгарым укуктуу өкүлү Аманбай Кайыпов Кара-Кече көмүр кенине барып, оор жүк ташуучу автоунаалардын айдоочулары менен жолугушту. Бул тууралуу өкүлчүлүктүн маалымат кызматы билдирди.
Белгилей кетсек, 2018-2019-жылдардын күз-кыш мезгилине облустун экономика тармагына жана калкына жалпы 67 миң 426 тонна көмүр керектелет. Анын ичинен эл 45 миң 500 тонна көмүр жагат.
"Бюджеттик мекемелерди көмүр менен камсыз кылуу үчүн тендерлерди өткөрүү боюнча жалпы 91 келишим түзүлгөн. 2018-жылдын 1-октябрына карата бюджеттик мекемелерге 10 916 тонна көмүр тартылды. Көмүр таратуу иштери улантылууда", — деп айтылат маалыматта.
Нарын облусу боюнча "Кара-Кече", "Миң-Куш", "Дүңгүрөмө" жана "Турук" көмүр участкаларында көмүр казган 15 ишкана бар.