БИШКЕК, 1-окт. — Sputnik. Жекшемби күнү Индонезия жер титирөө учурунда жүздөгөн адамдын өмүрүн сактап, өзү каза болгон 21 жаштагы авиадиспетчер менен коштошту. Бул тууралуу Daily Mail басылмасы жазды.
Антониус Гунаван Агунг 28-сентябрь күнү Сулавеси аралында күчү 7,4 баллга жеткен жер титирөө маалында Palu's Mutiara SIS Al-Jufrie аэропортунда иштеп, Batik Air компаниясынын бортунда жүздөгөн жүргүнчүсү бар учагына учууга көрсөтмө берип жаткан.
Жердин силкинүүсүнүн магнитудасы 6,1ге жеткенде диспетчерлерге сыртка чыгууга буйрук берилген. Бирок Агунг учуу тилкесиндеги аба кемесин орто жолго таштабайм деп абага көтөрүлүп кеткенге чейин көзөмөлдөп турган.
"Учакка коркунуч жок экенине көзү жеткенден кийин ал сыртка чыга албай калган. Жердин силкинүүсү 7,4 баллга жеткенде, ал 4-кабаттын секирип, ички органдары катуу жабыркаган", — деп жазылат маалыматта.
Эске салсак, жума күнү эртең менен Сулавеси аралында Палу шаарынан анча алыс эмес жерде магнитудасы 6,1ге жеткен жер титирөө болуп, бир аздан кийин кайтадан магнитудасы 7,4кө жеткен жер титиреген. Анын кесепетинен Палу шаарын бийиктиги 2 метрге жеткен цунами каптаган. Дүйшөмбү күнү эртең менен каза болгондордун саны 1200гө жеткени кабарланды.