Бизде аз пенсия менен көп пенсиянын айырмасы 50 пайызды түзөт. Бул көрсөткүч мисалы Казакстанда болгону беш пайыз. Бул тууралуу Айылчы Сарыбаев Sputnik Кыргызстан радиосунун эфиринде маек куруп жатып билдирди.
Анын айтымында, өзүнүн аспиранттары Кыргызстандагы пенсия системасы боюнча изилдөө жүргүзүп, ушундай тыянакка келишкен.
"Кыргызстанда пенсиялык система реформаланып келе жатып токтоп калган. Бизде аз пенсия алган адамдар менен жогорку пенсия алгандардын айырма өтө эле чоң. Мисалы мен өзүмдү эле айтсам, өмүр бою пенсиялык төлөмдөрдү төлөп жүрүп да, аз эле пенсия алам. Менден 10-20 эсе аз пенсиялык төлөм төлөгөндөр, тескерисинче көп акча алышат. Бул багытта Россия өзгөрүүгө чоң-чоң кадамдарды жасап келе жатат. Биз да ошондой иш аракеттерди жасашыбыз керек. Казакстанды ала турган болсок, аларда эң жогорку пенсиялык төлөм менен эң аз пенсиянын айырмасы болгону беш пайызды түзсө, бизде бул көрсөткүч 50 пайызга барат", — деди Сарыбаев.
Ал бул маселени чечүү мезгилдин талабы экенин кошумчалады.