ЖОЖду аяктаган студенттердин көбү жөнөкөй арыз жазганды билбейт. Бул тууралуу Назаркул Ишекеев Sputnik Кыргызстан радиосунун таңкы эфиринде маек куруп жатып билдирди.
Анын айтымында, студенттердин көбү же орус тилин, же кыргыз тилин сабаттуу билбей жатат.
"Аймактардан келген жаштар айылда сабактарды кыргызча, шаарга келип орусча окуйт. Мындан улам алардын көпчүлүгү ЖОЖду аяктаганда же орусчаны, же кыргызчаны кыйратпай жатат. Жөнөкөй арыз жазганды билишпейт. Мындай көрүнүш албетте өкүнүчтүү. Мамлекеттик тил комиссиясы кыргыз тилин өнүктүрүүгө болгон күч аракетин жумшап жатат. Бирок тилди өнүктүрүү маселеси бир гана бизге байланыштуу эмес. Аны жайылтып, муундан-муунга өткөрүп берүү элдин колунда", — деди Ишекеев.
Ал тил маселеси 23-сентябрда гана каралбаш керектигин кошумчалады.