БИШКЕК, 28-сен. — Sputnik. Чек арачылар "Манас-аэропорту" көзөмөл өткөрүү жайынан жасалма паспорт менен өлкөгө кирүүгө аракет кылган Тажикстандын жаранын кармашты. Бул тууралуу мамлекеттик чек ара кызматынан билдиришти.
Ага ылайык, окуя 28-сентябрда катталган.
"Стамбул — Бишкек каттамы менен учуп келген жарандарга паспорттук көзөмөл жүргүзүү учурунда чек ара кезмети 1985-жылы туулган Б.Х. аттуу Тажикстандын жаранын кармашкан. Документти текшерүү учурунда чек арачылар паспорттун толугу менен жасалма экенин аныкташкан", — деп айтылат маалыматта.
Тиешелүү документтер толтурулгандан кийин кармалган жаран УКМКнын аймактык бөлүмүнө тапшырылган.