БИШКЕК, 26-сен. — Sputnik. Улуу Британиянын Стаффордшир шаарында жашаган 73 жашар Энн Итон аттуу аял 1782-жылы жазылган сүйүү катын кокустан таап алды. Бул тууралуу Metro басылмасы жазып чыкты.
Билдирүүгө ылайык, алардын үйүндө муундан муунга берилчү Георгиана доорунан бери сакталып келе жаткан баш катырма конверт бар болчу. Мындай конверт 18-кылымда популярдуу болгон. Көпчүлүк учурда алар сүйүү каттарын жазганда, сүйүктүүсүнүн колун сураганда колдонулчу. Ал учурда сүйүүсүн ыр саптары жана көгүчкөн менен таш баканын сүрөттөрү менен билдиришкен. Жүрөктүн сүрөтү чапталган конверт кат жазган адамдын жүрөгүнүн символу болгон.
"Сүйүктүүм менин! Сиз колуңузда кармап турган жүрөк конвертти ачканда сынып кетет. Менин сүйүүгө толгон жүрөгүм да жараланып, сынып калган" деп башталган кат.
Жаш жигит сүйүктүү кызы анын жалгыз бакыты экенин айтып, бардык атаандаштарын жанына жолотпоосун суранган. Жигит сүйүктүүсү ага турмушка чыкмайынча артынан калбай турганын белгилеген.
Өткөн доорго таандык сүйүү катын улгайган аял аукционго коюп 200 фунтка (17,3 миң рубль) баалоону туура көргөн. Аукцион 15-октябрда башталат.