БИШКЕК, 6-сен. — Sputnik. Мамлекеттик бажы кызматынын мурдагы төрагасы Адамкул Жунусовго издөө салынды. Ага карата Кылмыш жаза кодексинин 304- беренеси (кызмат абалынан кыянаттык менен пайдалануу) боюнча кылмыш иши козголуп, анын коррупциялык аракеттеринен улам мамлекетке 167 миллион сомдой зыян келтирилгени айтылууда.
Sputnik Кыргызстан агенттиги аткаминердин жана анын жакындарынын кирешеси тууралуу декларациясына көз чаптырды.
Жакын туугандары эч кандай акча тапкан эмес, бирок автоунаа, жарым гектар жер, дача жана эки гаражы бар экени көрсөтүлгөн. Ошондой эле 131, 218 жана 208 чарчы метрлик үч батирге ээлик кылышат.
Ал эми 2016-жылдын жыйынтыгы боюнча Жунусов 255 миң 469 сом тапкан. Ошол жылы апрелде Евразиялык экономикалык комиссияга министр болуп дайындалган.
Декларацияда 2015-жылкы мүлкүнүн баарын кайтадан көрсөткөн. Документке ылайык, дагы деле машинасы жок жүргөнүн билдирген. Туугандары да 2015-жылдагы мал-мүлкүн көрсөтүп, кошумча бир гаражга ээ болушканын жазышкан.