БИШКЕК, 5-сен. — Sputnik. Көчмөндөрдүн дүйнөлүк III оюндары өтүп жаткан "Кырчын" этношаарчасында Британиянын Астанадагы элчилигинин аскер атташеси Эндрю Холтандын кымбат баалуу фото жана видео камералары жоголду. Бул тууралуу Sputnik Кыргызстан агенттигине Ысык-Көл милициясынын маалымат катчысы Сталбек Усубакунов кабарлады.
Анын айтымында, дипломат буюмдарынын жоголгондугу тууралуу арызды 5-сентябрь күнү эртең менен жазган.
"Кырчын жайлоосуна айрым чет элдик туристтер өздөрү алачык тигип алып жашап жатышат. Ал эми британиялык конок алачыгын алардан обочо жакка койгон экен. Кечээ кечинде фотоаппарат жана видеокамерасын алачыкка кароосуз таштаган бойдон концертке кетиптир. Кечинде барып уктап калган бойдон эртең менен караса буюмдары ордунда жок болуп чыкты", — деди Усубакунов.
Маалыматка караганда, Кырчынды көзөмөлдөгөн тартип сакчылары британиялык конокко туристтерден өтө алыс жайгашып алуусу боюнча эскертүү берген.
Буюмдар жоголгондугу боюнча маалымат түшөөрү менен милиция кызматкерлери аймакты тыкыр карап чыгып, учурда облус милициясынын тажрыйбалуу адистеринен ыкчам-иликтөө тобу түзүлдү.