БИШКЕК, 4-сен. — Sputnik. АКШнын Түштүк Каролина штатынын тургуну күйөөсүн көзгө тамчылата турчу дары менен өлтүргөн деген айып менен кармалганын New York Post басылмасы жазды.
Укук коргоо органдарынын маалыматы боюнча 64 жаштагы Стивен Клейтондун сөөгү өз үйүнөн табылган. Алгач ал үйдөгү тепкичтен кулап кетип каза болду деп болжолдонгон. Бирок өлүкканадан текшере келгенде организминен химиялык заттар табылган.
Маркумдун жубайы Лана Клейтондун берген көрсөтмөсүнө ылайык, үч күн бою ал жолдошу ичкен сууга көзгө тамчылата турган дарыдан кошуп турган. Адистердин айтымында, бул химиялык кошулма кишинин организмине киргенден кийин нерв системаларын жабыркатат.
New York Post басылмасынын жазышынча Клейтон бир канча жыл мурун жолдошу ала жипти аттаганын социалдык тармактагы баракчасына жазган. Күйөөсүн өлтүрүүгө ушул факты себеп болгону болжолдонууда. Укук коргоо органдары болсо нагыз себебин аныктоого аракет кылууда.