Көчмөндөр оюндарында керек учурда токтоосуз алгачкы жардамды көрсөтүүгө даярбыз. Бул тууралуу Кубанычбек Калмаматов Sputnik Кыргызстан радиосунда маек куруп жатып билдирди.
Анын айтымында, аталган иш-чара учурунда медициналык биринчи жардам бейтаптын жарандыгына карабай акысыз көрсөтүлөт.
"Учурда Көчмөндөр оюндарына толук кандуу даярбыз деп айта алам. Алгачкы жардам көрсөтүүгө керектелчү дары-дармектер жетиштүү түрдө алынды. Жеринен иш алып барчу дарыгерлер да толук даярдыкта турушат. Кырсык болбой эле койсун, бирок андай учурда бейтапты Ысык-Көл аймактык ооруканасы кабыл алат. Ал үчүн бүт шарттар каралган. Мындан сырткары, жарандардын тамак-ашка ууланып калбашы үчүн Санэпидемиологиялык көзөмөл департаменти менен тыгыз иш алып барабыз", — деди Калмаматов.
Ал иш-чара учурунда жеринен тамак сатып алып жегенде өтө кылдат болуп, сатуучулардан тиешелүү уруксат кагаздарын талап кылуусу керектигин кошумчалады.