Микрохирургияда дүйнөнү таң калтырган эмгектерибиз бар. Булар өзгөчө күйүктөн кийинки, түрдүү кырсыктардан улам же төрөлгөнүнөн кандайдыр бир терисинде кемчиликтери бар бейтаптарга жасалган операциялар. Бул тууралуу Керим Бээрманов Sputnik Кыргызстан радиосунун таңкы эфиринде маек куруп жатып билдирди.
Анын айтымында, мындай операцияларды жасоого заманбап техниканын жетишсиз экенине карабай, жергиликтүү микрохирургдар ийгиликтерди жаратышууда.
"Биздин хирург дарыгерлер ар тараптан дүйнөлүк кесиптештерин таң калтырып келишет. Улуттук госпиталдын дарыгерлери жасаган реконструкциялык операциялар да булардын катарында. Заманбап техникалары бар туруп, бизде жасалган операцияларды жасай албаган өлкөлөр көп. Мындан сырткары, профессор Мырзабек Макеевдин жетекчилиги астында "Дүйнөлүк микрохирургия атласы" деген китеп чыгарганбыз. Бул эмгегибизди да чет элдик кесиптештерибиз жогору баалады", — деди Бээрманов.
Ал ошондой эле кыргыз микрохирургдары дүйнөдөгү түрдүү кесиптик жыйындарда жетекчилик кылып, активдүү катышып келерин кошумчалады.