БИШКЕК, 22-авг. — Sputnik. Сооронбай Жээнбеков 2010-жылдын Апрель окуяларында курман болгондордун жана жабыр тарткандардын туугандарына социалдык колдоо көрсөтүүнү координациялоо боюнча Мамлекеттик комиссиянын мүчөлөрүн кабыл алды. Бул тууралуу президенттин маалымат кызматынан кабарлашты.
Мамлекет башчы 2010-жылдагы окуяларда жабыркагандар жана курман болгондордун үй-бүлөсүнө мамлекет тарабынан дайыма көңүл бурулуп, колдоо көрсөтүлөрүн белгиледи.
"Чыныгы баатырлар мамлекеттин тарыхында калышы керек. Бул окуялар өлкөнүн билим берүү системасынын тарых боюнча окуу китептеринде чагылдырылып, илимий баа берилиши керек", — деди мамлекет башчы.
Жолугушуунун катышуучулары Жээнбековго колдоосу жана жылуу кабыл алгандыгы үчүн ыраазычылык билдирип, 2010-жылдагы окуялардын катышуучулары саясий оюндардан тышкары болушу керектигин белгилешти.