Сценарист учурда чыгармачылык менен жигердүү алектенип, жаңы эмгектерди жаратууга бел байлаган маалы.
Он бир туугандын экинчиси. Темир Бирназаров 1965-жылы 22-августта Нарын шаарында туулган. Атасы музыкалык аспаптарда ойноп, энеси кол өнөрчүлүк менен алектенген үй-бүлөдө тарбияланган. Он бир туугандын экинчиси мектепти аяктагандан кийин аскерден келип жогорку окуу жайга тапшыруу үчүн Москвага жол тартат. Бирок кабыл алуу учурунан кечигип, окууга өтпөй калган.
Заводдо иштеген Темир. Андан соң кино тартууну эңсеген жаш талант Ростов-на-Дону шаарындагы заводдо иштеп жүрүп, ишкананын алдындагы илимий-популярдуу тасмалардын студиясына жумушка кирет. Ал жакта 1,5 жылдай эмгектенип тасма тартуунун ыкмаларын үйрөнгөн. Кийин Кыргызстанга кайтып келип Нарын облусунун драма театрында декоратор болуп иштеп жаткан кезинде Алматыдагы Театр жана ино институтунун режиссерлук факультетине өтүп, аны 1994-жылы бүтүргөн.
Алгачкы эмгек. Эмгек жолунда "Ыйлаба керик!" көркөм тасмасын жаратып тушоосу кесилген. Ал фильм көрүүчүлөр тарабынан жылуу кабыл алынып Франция, Португалия жана Италиядагы эл аралык фестивалда бир катар сыйлыктарга татыган.
Күчтүү режиссер. Көптөгөн эл аралык сыйлыктардын ээси "Шайтан көпүрө", "Жайык", "Сырга", "Ордо" даректүү, "Парз", "Белгисиз маршрут", "Кумар", "Түнкү кырсык" жана "Кош келиниз, президент мырза!" көркөм фильмдерин жараткан. Ал өзүнүн кесиптештеринен көз карашы менен айырмаланып эмгектеринде көпчүлүк байкабаган коомдогу көйгөйлөрдү чагылдырып, каармандын образын ачып берүүдө алдыга эч кимди салдырбай келет.
Кытайга сатылган кино. Бирназаровдун "Түнкү кырсык" тасмасы быйыл Таллин шаарында өткөн "Темные ночи" эл аралык кинофестивалында баш байгеге ээ болгон. Аталган фильмди жакында эле Кытай мамлекети сатып алып коңшу өлкөнүн тургундарына көрсөтмөк болду. Бул Кыргызстандын тарыхында чет өлкөгө коммерциялык багытта кеткен биринчи эмгек.
Үйү жок устат. Темир Бирназаров 2001-жылы "Тазар" кинокомпаниясын негиздеген. Сценарист ал жактан ондогон жаш киночуларды тарбиялап өстүргөнгө жетишкен. Эки кыз, бир уулдун атасынын өзүнүн жеке үйү жок. Чыгармачыл инсан дүнүйө чогултуп жүрүп өтүп кетүүдөн оолак болсом дейт.